(រដ្ឋបាលខេត្តកំពង់ធំ)៖ ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានលើកទឹកចិត្ត និងផ្តាំផ្ញើដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ទាំងអស់ត្រូវខិតខំបញ្ចេញឱ្យអស់សមត្ថភាព ដើម្បីទទួលបានលទ្ធផលល្អនិងជូនពរឲ្យជាប់ទាំងអស់គ្នា។
ឯកឧត្តម អភិបាលខេត្តកំពង់ធំ បានលើកឡើងនៅក្នុងឱកាសអញ្ជើញចូលរួមពិនិត្យ និងបើកវិញ្ញាសារប្រឡងសញ្ញាប័ត្រមធ្យមសិក្សាទុតិយភូមិ (Bac II) នៅមណ្ឌលប្រឡងវិទ្យាល័យកំពង់ធំ នៅព្រឹកថ្ងៃទី១០ ខែ សីហា ឆ្នាំ២០២៦។
ឯកឧត្តម បានបញ្ជាក់ថា សម្រាប់ដំណើរប្រឡងថ្ងៃទី១នេះ គឺដំណើរការប្រឡងបានពិនិត្យភាពបិទជិត ដើម្បីធានាបានថា ការប្រឡងប្រព្រឹត្តទៅដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
ឯកឧត្តមបានបន្តថា ចំពោះបេក្ខជនបេក្ខនារីទាំងអស់ដែលត្រូវចូលប្រឡងសញ្ញាបត្រមធ្យមសិក្សាទុតិយភូមិនាពេលនេះ ត្រូវតែយកចិត្តទុកដាក់ខ្ពស់ និងខិតខំសរសេរឱ្យល្អត្រឹមត្រូវទៅលើក្រដាសវិញ្ញាសារ មុននឹងឆ្លើយ ត្រូវគិតត្រិះរិះពិចារណាឱ្យបានគ្រប់ជ្រុងជ្រោយ និងត្រូវខិតខំប្រឹងប្រែងឱ្យអស់ពីសមត្ថភាព ដោយត្រូវគោរពឱ្យបានខ្ជាប់ខ្ជួន នូវបទប្បញ្ញត្តិ និងបទបញ្ជាផ្ទៃក្នុងនៃការប្រឡង និងប្រកាន់យកនូវគោលការណ៍ «ចេះជាប់»។
តាមការបញ្ជាក់របស់បេក្ខជនបេក្ខនារី បានលើកឡើងថា ពួកគេមានសង្ឃឹមក្នុងការប្រឡងច្រើនដោយសារការសិក្សាររៀនសូត្របានច្រើនជាងឆ្នាំមុនព្រោះប្រទេសកម្ពុជាបានដំណើរការសិក្សារៀនសូត្រពេញមួយឆ្នាំ។
សម្រាប់ការសិក្សាក៏ដូចជាការប្រឡងមិនមានអ្វីគួរឲ្យព្រួយបារម្ភនោះទេ ពិសេសគឺបេក្ខជនបានដឹងអំពីបទបញ្ជាផ្ទៃក្នុងរបស់ក្រសួងអប់រំ យុវជន និងកីឡា ដែលបានដាក់ចេញនិងផ្សព្វផ្សាយតាមរយៈបណ្ដាញសង្គម ដើម្បីឲ្យបេក្ខជនបានដឹងពិសេសដំណើរការប្រឡងជារៀងរាល់ឆ្នាំ។
សូមបញ្ជាក់ថា ក្នុងឆ្នាំសិក្សា២០២៥-២០២៦ សម័យប្រឡងថ្ងៃទី១០ ខែសីហា ឆ្នាំ២០២៦ នេះនៅក្នុងខេត្តកំពង់ធំ មានមណ្ឌលប្រឡងចំនួន១៣មណ្ឌល ស្មើនឹង ២៣៦បន្ទប់ មានបេក្ខជនសរុប ៥.៨៨៣នាក់ ស្រី៣.៤០៩នាក់ ចែកចេញជា÷ ១.ថ្នាក់វិទ្យាសាស្រ្តមាន០២មណ្ឌល ស្មើ ៤៨បន្ទប់ មានបេក្ខជនសរុប ១.១៨៨នាក់ ស្រី ៦៩៦នាក់។ ២.ថ្នាក់វិទ្យាសាស្ត្រសង្គមមាន១២មណ្ឌល ស្មើនឹង ១៩១បន្ទប់ មានបេក្ខជន ៤.៦៩៥ នាក់ ស្រី ២.៧១៣នាក់។ អត្ថបទ រដ្ឋបាលខេត្តកំពង់ធំ